Digwyddiad Dathlu Arwain ar gyfer Diogelwch Cleifion
Gan Martine Price, Nyrs Arweiniol Clinigol, Gwelliant Cymru.
Ar 9 Mehefin, aeth ein Harweinwyr Diogelwch i ddigwyddiad dathlu wrth iddynt gwblhau Arwain ar gyfer Diogelwch Cleifion. Cyflwynwyd y rhaglen mewn partneriaeth â Gwelliant Cymru a’r Sefydliad Gwella Gofal Iechyd (IHI). Dechreuodd ym mis Mawrth ac roedd 38 o gyfranogwyr, pob un yn uwch arweinydd o bob bwrdd iechyd ac ymddiriedolaeth yng Nghymru. Mae rolau pobl yn y grŵp yn cynnwys Cyfarwyddwyr Nyrsio Cynorthwyol, Dirprwy Gyfarwyddwyr Nyrsio, Therapïau a Meddygaeth, Ymgynghorwyr, Arweinwyr Ansawdd a Diogelwch. Mae’n grŵp anhygoel ac mae gan bob un ohonynt rolau allweddol ar gyfer ansawdd a diogelwch yn eu sefydliadau.
Gwelliant Cymru yw’r gwasanaeth gwella ar gyfer GIG Cymru. Ein nod yw cefnogi creu system iechyd a gofal o’r ansawdd gorau i Gymru fel bod gan bawb fynediad at ofal diogel, effeithiol ac effeithlon yn y lle iawn ac ar yr adeg iawn ar draws y system ofal gyfan. Ar ran GIG Cymru, rydym wedi creu partneriaeth â’r Sefydliad Gwella Gofal Iechyd (IHI) i greu’r Bartneriaeth Gofal Diogel gyda byrddau iechyd ac ymddiriedolaethau ledled Cymru.
Nod y Bartneriaeth Gofal Diogel yw darparu cymorth wedi’i gydgysylltu’n genedlaethol ac wedi’i ddarparu’n lleol ar gyfer gofal diogel dibynadwy ac effeithiol. Bydd yn cefnogi cydweithredu cenedlaethol a dysgu trawsffiniol. Bydd arweinwyr a thimau pob bwrdd iechyd neu ymddiriedolaeth yn adeiladu ar y gwaith presennol ac yn cryfhau’r gallu i wella er mwyn sefydlu eu systemau ar gyfer gofal dibynadwy a diogel iawn.
Mae’r Bartneriaeth Gofal Diogel yn cynnwys pedwar gweithgaredd: Arwain ar gyfer Diogelwch Cleifion, Ymweliadau Safle Sylfaenol â phob bwrdd iechyd ac ymddiriedolaeth dros yr haf hwn, Hyfforddi ar gyfer Diogelwch Cleifion a’r Grŵp Cydweithredol Gofal Diogel. Arwain ar gyfer Diogelwch Cleifion oedd y cam cyntaf tuag at y Grŵp Cydweithredol Gofal Diogel. Fe’i cynlluniwyd i ddatblygu rhwydwaith o arweinwyr clinigol ym maes diogelwch cleifion ar gyfer GIG Cymru. Bydd yr arweinwyr hyn yn gweithredu fel noddwyr ar gyfer diogelwch cleifion ar draws y Bartneriaeth ac yn chwarae rhan allweddol mewn sicrhau ansawdd a diogelwch o fewn eu bwrdd iechyd neu ymddiriedolaeth.
Dros gyfres o weithdai dan arweiniad cyfadran arbenigol, mae’r cyfranogwyr wedi dysgu sylfeini creu systemau ar gyfer diogelwch. Defnyddio’r Fframwaith ymarferol ar gyfer Gofal Diogel, Dibynadwy ac Effeithiol i wella diogelwch cleifion yn barhaus ac yn ddibynadwy. Mae’r grŵp wedi rhannu a dysgu gyda’i gilydd ac maent bellach wedi’u harfogi i arwain a dylanwadu ar waith gwella a chreu’r diwylliant a’r amodau sydd eu hangen i wella allu ffynnu.
Nid yw ymdrechion i wella diogelwch, dibynadwyedd ac effeithiolrwydd gofal iechyd yn newydd; mae sefydliadau wedi bod yn gweithio tuag at y nodau hyn ers blynyddoedd. Fodd bynnag, yn aml caiff strategaethau amrywiol eu datblygu mewn gwagle, heb werthfawrogi’n llawn sut mae gwahanol ddulliau a mentrau yn effeithio ar ei gilydd. Y Fframwaith ar gyfer Gofal Diogel, Dibynadwy ac Effeithiol yw sail y rhaglen a’n partneriaeth ag IHI. Mae’r fframwaith yn cynnwys dau barth sylfaenol, sef diwylliant, a’r system ddysgu, ynghyd â naw cydran gydgysylltiedig, y mae cleifion a theuluoedd yn greiddiol iddynt. Yn gryno ac mewn un lle, mae’n dwyn ynghyd yr holl gysyniadau strategol, clinigol a gweithredol sy’n hanfodol i sicrhau gofal diogel, dibynadwy ac effeithiol.
Rydym wrth ein bodd bod ein cynrychiolwyr wedi graddio o’r rhaglen Arwain ar gyfer Diogelwch Cleifion ac mae eu gwybodaeth, eu sgiliau, eu hegni a’u cymhelliant i rannu a dysgu gyda’i gilydd wedi gwneud cymaint o argraff arnom. Bydd y rhwydwaith hwn o arweinwyr yn ganolog i ddatblygu Gofal Diogel Gyda’n Gilydd ac mae pob un ohonom yn Gwelliant Cymru a’r IHI yn gyffrous ac yn teimlo’n ffodus i fod yn gweithio gyda’r grŵp dawnus hwn o arweinwyr.
Dyma rai o’r sylwadau a wnaeth y rhai oedd yn bresennol ar y diwrnod:
“Gweithio gyda’n gilydd fel system i fwrw ymlaen â gwella ledled Cymru.”
“Diwrnod graddio ar gyfer ein rhaglen, mae ein taith wella yn dechrau yma.”
“Gwnaeth i mi feddwl yn wahanol, fy rôl fel arweinydd, creu’r amgylchedd ar gyfer ansawdd.”
“Adeiladu rhwydwaith sy’n cyd-fynd â’r Fframwaith ar gyfer Gofal Diogel, Dibynadwy ac Effeithiol.”
Rydym nawr yn symud tuag at y gweithgaredd nesaf: datblygu hyfforddwyr diogelwch cleifion lleol i weithio gyda’r noddwyr (Arwain ar gyfer Diogelwch Cleifion) i gefnogi timau trwy’r Grŵp Cydweithredol Gofal Diogel.
Rydym nawr yn agored i geisiadau gan eich sefydliad ar gyfer y rhaglen Hyfforddi ar gyfer Diogelwch Cleifion. Cysylltwch â mi am ragor o fanylion Martine.Price@wales.nhs.uk