Rhoi llesiant yn gyntaf: adeiladu gweithlu ymgysylltiol a gwydn

Gan Casimir Germain, Arweinydd Arweinyddiaeth a Datblygu Sefydliadol, Gweithrediaeth GIG Cymru

---

Mae’n bleser gennyf siarad yng Nghyngres Diogelwch Cleifion Cyfnodolyn y Gwasanaeth Iechyd (HSJ) ym Manceinion ar ôl i’n poster ennill y categori ‘amddiffyn a chefnogi’r gweithlu’.

Gwahoddwyd sefydliadau fel ein un ni i gyflwyno posteri ar fentrau diogelwch a gwella ansawdd ar draws deg categori fel rhan o gystadleuaeth. Fe wnaethom ennill dri o’r categorïau poster. Gallwch chi ddarllen mwy amdanyn nhw ar ein gwefan. I ddathlu, fe’m gwahoddir i siarad am gynnwys ein poster yn y digwyddiad.

Llesiant yn Gyntaf: Mae adeiladu gweithlu ymgysylltiol a gwydn’, yn canolbwyntio ar y gwaith rydym wedi’i wneud i gynnal, ac mewn rhai achosion gwella, llesiant ac ymgysylltiad ein staff yn ystod cyfnod o newid sefydliadol.

Gall newid sefydliadol fod yn frawychus

Rwyf bob amser wedi bod â diddordeb mewn llesiant, hyd yn oed yn fy rôl flaenorol fel athro; rwyf wrth fy modd yn rhyngweithio â phobl – a bod o’u cwmpas – felly roeddwn wrth fy modd o gael y cyfle i weithio ar lesiant ac ymgysylltu o fewn Gwelliant Cymru. Yn ystod y cyfnod hwn, roeddem ynghanol y cyfnod pontio i Weithrediaeth GIG Cymru. Sylweddolais yr angen am ymyrraeth gadarnhaol a gosodais nod personol i mi fy hun i gefnogi cymaint o gydweithwyr â phosibl.

Gall newid sefydliadol fod yn frawychus, yn gythryblus ac yn llethol i rai pobl, a gall gael effaith wirioneddol ar lesiant emosiynol a meddyliol ein gweithlu.

O edrych ar y rhaglen lesiant a gynigiwyd i weithwyr, sylwais ar fwlch mewn cymorth wyneb yn wyneb a arweinir gan bobl. Cyflwynwyd y canfyddiad hwn i’r tîm arweinyddiaeth a gefnogodd fi i gynnal cyfres o sesiynau llesiant. Gan ein bod yn sefydliad gyda methodoleg gwella yn ganolog iddo, roeddem hefyd am fesur a chasglu data dros amser i weld a oedd ein hymyriadau wedi cael effaith.

Gweld y llawenydd mewn gwaith

Gan ddefnyddio model Gofal Diogel, Effeithiol a Dibynadwy (SREC)y Sefydliad Gofal Iechyd a Gwella (IHI), fe wnaethom ganolbwyntio ar bynciau arweinyddiaeth, diogelwch seicolegol a diwylliant sefydliadol ehangach. I ddechrau, fe wnaethom gyflwyno’r syniad i’n grŵp Llesiant ac Ymgysylltu. Dewiswyd y thema ‘mae cyfathrebu a chydweithio effeithiol yn ganolog i bopeth a wnawn.’ Drwy rymuso cydweithwyr ar bob lefel i hyrwyddo mentrau llesiant, yn ogystal â threfnu sesiynau gwirio wythnosol, bu hyn yn gymorth i ni greu amgylchedd lle mae staff yn cael eu gwerthfawrogi a’u cefnogi i gyfrannu ar eu gorau.

Fe wnaethom ddilyn fframwaith ‘Joy in Work’ IHI, lle cynhaliwyd arolwg staff misol, gyda’r un cwestiynau ar bynciau gan gynnwys diogelwch seicolegol, adnabyddiaeth a chadernid.

Yn ogystal â’r grŵp staff a’r arolwg wythnosol, cynhaliom y canlynol:

• Sesiynau cinio a dysgu – cyfarfodydd ar-lein anffurfiol oedd y rhain a gynlluniwyd i gysylltu pobl. Roedd ganddynt ystafelloedd ymneilltuo, felly roedd staff yn cysylltu ag eraill o wahanol adrannau. Roedd y rhain yn canolbwyntio ar bynciau fel ymwybyddiaeth ofalgar, newyddiadura, a myfyrdodau.
• Sesiynau hyfforddiant – cynhaliwyd y rhain ar sail un-i-un yn bennaf yn mynd i’r afael â materion yn ymwneud â rheoli pontio a newid.
• Sesiynau tîm cyfryngol – fe wnes i hwyluso sesiynau rhwng timau a’u rheolwyr, felly cafodd pawb gyfle i siarad mewn fforwm agored a diogel.
• ‘Rowndiau Schwartz’ pwrpasol – cynigiwyd y rhain i staff clinigol a rheng flaen lle’r oedd gan weithwyr le ac amser i fyfyrio ar eu llesiant emosiynol a chymdeithasol.
• Sesiynau paned a sesiynau cwrdd ar hap – cynlluniwyd y rhain i staff alw heibio gyda phaned (yn rhithwir ac yn bersonol) a siarad â phobl nad ydynt efallai’n gweithio’n agos â nhw.

Cefais hefyd y fraint o gynefino’r staff â’r sefydliad. Rhoddodd hyn y cyfle i mi glywed yn uniongyrchol gan gyflogeion ynghylch pam y gwnaethant ymuno ac am y ffyrdd y gallwn ddefnyddio eu profiadau cynefino i gryfhau’r diwylliant sefydliadol.

Grym diogelwch seicolegol

Felly, beth gyflawnodd yr holl waith hwn? Mae’r canlyniadau yn siarad drostynt eu hunain.

Dros gyfnod o wyth mis, fe wnaethom gynnal y rhan fwyaf o’n sgorau arolwg ‘llawenydd mewn gwaith’ er gwaethaf yr heriau a ddaw yn sgil y cyfnod pontio. Gwelwyd gwelliant cyffredinol o 22% mewn rhai meysydd o’r arolwg – gan gynnwys cael eich trin ag ymddiriedaeth a pharch a theimlo bod cefnogaeth yn y gwaith. Roedd yna hefyd gynnydd o 15% yn nifer y staff yn cael eu cydnabod a’u diolch sy’n grymuso staff i gyflawni eu rolau, er budd y sefydliad cyfan.

Mynychodd 10% o staff (gan gynnwys timau clinigol) y sesiynau a arweiniwyd gan bobl a theimlwyd y manteision yn wirioneddol. Cawsom adborth fel:

“O ganlyniad i’r sesiwn yr wythnos ddiwethaf, roedd gen i’r hyder i rannu gyda fy rheolwr fy mod i’n teimlo’n ansicr…dw i’n teimlo’n llawer gwell am y peth nawr.”

“Diolch am y sesiynau sydd wir wedi cefnogi fy nhwf fel arweinydd…dim ond i gymryd seibiant a dysgu gyda’n gilydd.”

Ar y cyfan, trwy fabwysiadu dull cyfannol sy’n canolbwyntio ar yr unigolyn i’n ffyrdd o weithio, mae hyn wedi profi pŵer diogelwch seicolegol wrth ysgogi ymgysylltiad a pherfformiad gweithwyr.

Rydym wedi parhau i gyfarfod fel grŵp llesiant ac ymgysylltu ac rydym yn dal i gynnal yr arolygon misol ‘Llawenydd mewn gwaith’. Nawr fy mod wedi mynd ar secondiad i Weithrediaeth GIG Cymru fel Arweinydd Arweinyddiaeth a Datblygu Sefydliadol, byddaf yn defnyddio’r canfyddiadau hyn i helpu i lunio diwylliant ein sefydliad sydd newydd uno.

Ni allaf ddiolch digon i’n tîm arweinyddiaeth gwych am weld y gwerth o ganiatáu imi gyflawni’r gwaith hwn ac i bawb yn Gwelliant Cymru a ymgysylltodd ag ef.

Gallwch ddarllen cynnwys y poster yma neu os ydych yn mynd i’r digwyddiad, byddaf yn siarad yn y Neuadd Arddangos ddydd Llun 16 Medi am 2pm. Gallwch ddod o hyd i’r rhaglen lawn ar wefan Cyfnodolyn y Gwasanaeth Iechyd (HSJ).